Прэзыдэнт ЗША прыгразіў зусім спыніць фінансаваньне Сусьветнай арганізацыі здароўя і выйсьці зь яе

Прэзыдэнт ЗША Дональд Трамп апублікаваў 19 траўня ў Twitter фота ліста, які ён накіраваў кіраўніку Сусьветнай арганізацыі здароўя (WHO) Тэдрасу Аданому Гебрэесусу. У лісьце Трамп даў арганізацыі 30 дзён на «асноўныя істотныя зьмены». Месяц таму Трамп даручыў адміністрацыі прыпыніць унёскі ЗША ў WHO, бо тая не рэагавала на пандэмію каранавірусу — «ня справілася са сваім асноўным абавязкам і павінна несьці адказнасьць». Цалкам чытайце па спасылцы.

Статыстыка «завісла»: тры тыдні ў Беларусі каля 918 новых выпадкаў COVID-19 і 4-5 прызнаных сьмерцяў

«Каранавірусныя» графікі Беларусі выглядаюць незвычайна і ў параўнаньні зь іншымі краінамі, і самі па сабе.

Тры тыдні таму, 28 красавіка, Міністэрства аховы здароўя Беларусі паведаміла пра выяўленьне 919 новых выпадкаў COVID-19 за дзень. Пасьля гэтага штодзённая статыстыка практычна не мянялася: за дзень выяўлялі мінімум 784, максымум 973 выпадкі, у сярэднім 918,238 інфікаванага за дзень. І гэтае «завісаньне» выглядае дзіўна з шматлікіх прычынаў, разважае ў блогу журналіст Алесь Арсёнаў. Чытайце цалкам па спасылцы.

Яшчэ 936 хворых і 4 памерлі. Апублікавалі новую афіцыйную статыстыку аб COVID-19 у Беларусі

Міністэрства аховы здароўя Беларусі апублікавала 19 траўня ў сваім Telegram-канале новую афіцыйную статыстыку распаўсюду COVID-19.

Паводле міністэрства, на 19 траўня ў Беларусі:

• агулам 31 508 чалавек са станоўчым тэстам на COVID-19 (у іх лік уваходзяць ачунялыя і памерлыя);
• 175 памерлых, зь якіх усе, як піша міністэрства, былі «з шэрагам хранічных захворваньняў» і каранавіруснай інфэкцыяй (шматлікія ​родзічы памерлых гавораць, гэта ня так — паміралі і без хранічных хваробаў);
• 10 620 пацыентаў паправіліся і выпісаныя пасьля COVID-19;
• гэта значыць, за дзень выявілі яшчэ 936 выпадкаў і прызналі яшчэ 4 сьмерці, выпісалі 490 чалавек;
• ад пачатку эпідэміі ў краіне зрабілі 375 076 тэстаў (плюс 10 757 за дзень);
• колькі пацыентаў у цяжкім стане ці на штучнай вэнтыляцыі лёгкіх, а таксама колькі хворых выпісалі дамоў на «амбуляторнае лячэньне», не паведамляецца.

На прадпрыемстве «Гродна Азот» 29 хворых на COVID-19

На прадпрыемстве «Гродна Азот» 29 чалавек са станоўчым вынікам тэсту на каранавірус, зь іх на 18 траўня ачунялі 8, паведамляе «Горадзенскі хімік».

Кантактаў першага ўзроўню на «Гродна Азоце» 37 чалавек, другога ўзроўню — 38. У філіяле «Завод Хімвалакно» 4 кантакты першага ўзроўню. Усяго на прадпрыемстве 60 чалавек з вострымі рэсьпіраторнымі віруснымі інфэкцыямі (зь іх на «Гродна Азоце» 54), зарэгістраваныя 2 пнэўманіі.

Мэдыкі чакалі большых даплат. Даведаліся ў прафсаюзаў, хто атрымае 600 рублёў

Мэдыкі 30-й паліклінікі Менску абураюцца, што не атрымалі абяцаных выплат за працу з пацыентамі з COVID-19, а тыя, хто сам перахварэў, не атрымалі кампэнсацыі. Кіраўніцтва паліклінікі тлумачыць, што выплаты атрымалі ўсе, каму яны належацца па законе.

Свабода разьбіралася ў сытуацыі. Чытайце па спасылцы >>

Амаль у паловы беларусаў з прычыны пандэміі ўпалі даходы, — апытаньне

Дасьледчыя кампаніі SATIO і BEROC прадставілі першыя вынікі трэцяй хвалі сацыялягічнага дасьледаваньня пра ўплыў пандэміі каранавірусу на беларусаў, якое правялі 8–11 траўня.

48,5% апытаных заявілі, што адчулі зьніжэньне сваіх даходаў за апошні месяц. Падчас папярэдніх апытаньняў у сакавіку пра зьніжэньне даходаў казалі 45% апытаных, у красавіку — 52%. Сярод асноўных прычын падзеньня даходаў апытаныя называлі:

• скарачэньне замоваў (35% сярод тых, у каго ўпаў даход),
• скарачэньне заробкаў (27%),
• адмена прэмій (22%),
• страта падпрацоўкі (17%).

Цалкам чытайце па спасылцы.

Работнікам установаў сацабслугоўваньня прызначылі даплаты за працу ва ўмовах эпідэміі каранавірусу

Паводле ўказу, надбаўкі будуць плаціць тым работнікам, якія працуюць з пацыентамі з інфэкцыйнымі захворваньнямі і кантактамі першага ўзроўню, якія знаходзяцца дома, пры працы вахтавым мэтадам. Падрабязнасьці, умовы і сумы даплат — па спасылцы.

Дырэктар — на бальнічным, настаўніца памерла. Што адбываецца ў гомельскай школе № 61

У Гомлі памерла 58-гадовая настаўніца пачатковых клясаў Марыя К. Яна працавала ў сярэдняй школе № 61. Па словах бацькоў школьнікаў, апошнім часам настаўніца была на апараце штучнай вэнтыляцыі лёгкіх і хварэла на каранавірус.

Школа № 61 па стане на 18 траўня працавала. Бацькі, якія забіралі дзяцей — вучняў малодшых клясаў, з групы падоўжанага дня, пацьвердзілі сьмерць настаўніцы. Дырэктар школы знаходзіцца на бальнічным, паведамілі ў адміністрацыі, прчыну бальнічнага не назвалі. Цалкам чытайце па спасылцы.

«Чыстыя» і «брудныя» зоны ды іншыя фікцыі ў беларускім COVID-шпіталі

Праз тыдзень, праведзены ў шпіталі для хворых на COVID-19, мяне выпісалі на «кантраляванае амбуляторнае лячэньне». У дакумэнце, які я падпісала, указана, што я абавязваюся прымаць усе прапісаныя лекі — і гэта сьмешна, бо пры выпісцы я не атрымала ўвогуле ніякіх рэкамэндацый, распавядае блогерка Свабоды Наста Захарэвіч. Чытайце блог па спасылцы.

Беларускія турфірмы атрымалі перадаплату кліентаў на 400 млн рублёў. Вярнуць іх нерэальна

Адначасовае патрабаваньне спажыўцоў вярнуць грошы за пуцёўкі з прычыны абмежаваньняў, выкліканых пандэміяй каранавірусу, прывядзе да банкруцтва ўсёй галіны, заяўляюць у Рэспубліканскім саюзе турыстычных арганізацый. На задавальненьне пазоваў можа разьлічваць ня больш як 5% турыстаў.

У сфэры турызму Беларусі занята блізу 5,5 тысячы чалавек. За мінулы год экспарт паслуг перавысіў 265 млн даляраў.

«Пры банкруцтве беларускіх турфірмаў усе грошы спажыўцоў і кампаній застануцца за мяжой, у пастаўшчыкоў паслуг. Вярнуць іх з-за мяжы будзе нерэальна», — гаворыцца ў паведамленьні на сайце саюзу. Цалкам чытайце па спасылцы.

«Чумным баракам нас ня лічаць». Ці пусьцяць беларусаў у краіны, якія выходзяць з эпідэміі?

18 траўня Эстонія спыняе авіязносіны з краінамі, дзе высокая рызыка заражэньня COVID-19, у тым ліку зь Беларусьсю. Ці ёсьць небясьпека, што Эўропа яшчэ доўга не адкрые свае межы для беларусаў? Разьбіраемся з экспэртамі. Чытайце па спасылцы.

«Белпошта» адкрыла прыём лістоў і пасылак у яшчэ 11 краінаў

Па стане на 18 траўня «Белпошта» прымае паштовыя адпраўленьні праз EMS у 45 краінаў, лісты і пасылкі — у 41 краіну (не прымае лістоў і пасылак, але прымае EMS у Румынію, Сэнэгал, Славенію і Ўругвай). Адкрыўся прыём лістоў у Аргентыну, Бразылію, Ганконг, Індыю, Мэксыку, Паўднёвую Карэю, Тайлянд, Эгіпэт і Японію.

«З улікам эпідэміялягічнай сытуацыі ў сьвеце, глябальных захадаў, накіраваных на стрымліваньне распаўсюду каранавірусу (COVID-19), авіякампаніі, якія ажыцьцяўляюць перавозку пошты з Рэспублікі Беларусь, пастаянна карэктуюць маршруты і скарачаюць колькасьць авіярэйсаў», — тлумачаць у «Белпшоце» зьменлівы сьпіс даступных для ліставаньня краінаў.

Тарыфы «Белпошты» на міжнародныя паслугі вырасьлі. Калі раней можна было адправіць простую паштоўку непрыярытэтна за 1,38 рубля, то цяпер тарыф — 1,50 рубля. Непрыярытэтная бандэроль вагой да 20 г падаражэла з 1,74 да 1,86 рубля, 20–50 г — з 2,16 да 2,28 рубля і гэтак далей. Вырасьлі і цэны на прыярытэтныя адпраўленьні. Просты малы пакет раней каштаваў 3,30 рубля за адпраўленьне (і прыярытэтнае, і не) і 12 рублёў за 1 кг (18 — за прыярытэтны), цяпер — 3,78 і 13,80 за кг (20,70 за кг прыярытэтнага.

Звыш 30 тысяч інфікаваных. Апублікаваная новая афіцыйная статыстыка распаўсюду COVID-19 у Беларусі

Паводле Міністэрства аховы здароўя, на 18 траўня ў Беларусі:

• агулам 30 572 чалавекі са станоўчым тэстам на COVID-19 (у іх лік уваходзяць ачунялыя і памерлыя);
• 171 памерлы, зь якіх усе, як піша міністэрства, былі «з шэрагам хранічных захворваньняў» і каранавіруснай інфэкцыяй (шматлікія ​родзічы памерлых гавораць, гэта ня так — паміралі і без хранічных хваробаў);
• 10 130 пацыентаў паправіліся і выпісаныя пасьля COVID-19;
• Гэта значыць, за дзень выявілі яшчэ 922 выпадкі і прызналі яшчэ 6 сьмерцяў, выпісалі 639 чалавек;
• ад пачатку эпідэміі ў краіне зрабілі 364 319 тэстаў (плюс 13 804 за дзень);
• колькі пацыентаў у цяжкім стане ці на штучнай вэнтыляцыі лёгкіх, а таксама колькі хворых выпісалі дамоў на «амбуляторнае лячэньне», не паведамляецца.

Беларускія лекары ананімна заяўляюць, што ня ўсім хворым ставяць адпаведны дыягназ, а мэдыкам бракуе сродкаў засьцярогі. У рытуальным агенцтве кажуць, што ў памерлых часьцей пазначаны дыягназ «неўдакладненая пнэўманія», а не «каранавірус». Міністэрства здароўя не залічвае да памерлых ад COVID-19 тых, у каго вірус «элімінавалі», а яны ўсё роўна памерлі.

Хоць намесьніца міністра здароўя заяўляе пра «выхад на плято», колькасьць хворых нават у статыстыцы ейнага міністэрства няспынна расьце. У афіцыйнай статыстыцы колькасьці зробленых тэстаў раней была анамалія — нібыта за 4 траўня зрабілі 0 тэстаў і выявілі 861 новы выпадак.

Паўтарэньня Вялікай дэпрэсіі ўдасца пазьбегнуць, — Фэдэральны рэзэрв ЗША

Амэрыканская эканоміка адчувае значнае скарачэньне па выніках другога кварталу 2020 году, але пазьбегне паўтарэньня Вялікай дэпрэсіі 1930-х, якая доўжылася шмат гадоў, заявіў 17 траўня Джэром Паўэл, старшыня Фэдэральнай рэзэрвовай сыстэмы, якая ў Злучаных Штатах выконвае функцыі цэнтральнага банку.

Паўэл сказаў у інтэрвію CBS, што «добры шанец» на аднаўленьне эканоміка атрымае сёлета ў трэцім квартале, але аднаўленьне росту можа заняць некаторы час.

Многія штаты ЗША паступова адмяняюць зьвязаныя з распаўсюджваньнем каранавіруснай інфэкцыі абмежаваньні, бо колькасьць людзей, якія сталі беспрацоўнымі за апошні час, перавысіла 36 000 000.

Лічбы на 17 траўня

• У сьвеце зафіксавалі звыш 4,8 мільёна выпадкаў COVID-19: каля 1,5 млн у ЗША, звыш 281,5 тысячы ў Расеі, звыш 287,5 тысячы ў Гішпаніі, звыш 243,5 тысячы ў Вялікай Брытаніі, 241 тысяча ў Бразыліі, 225,5 тысячы ў Італіі, 179,5 тысячы ў Францыі, 176,5 тысячы ў Нямеччыне, 149,5 тысячы ў Турэччыне, звыш 120 тысяч у Іране.
• Ад хваробаў, якія выклікаў новы каранавірус, у сьвеце прызнаныя сьмерці 316 730 чалавек. Зь іх 90 978 у ЗША, 34 636 у Вялікай Брытаніі, 31 908 у Італіі, 28 108 у Францыі, 27 650 у Гішпаніі, 16 122 у Бразыліі.
• Выпісалі 1,86 мільёна пацыентаў, якіх вылекавалі ад COVID-19. «Актыўных выпадкаў» хваробы застаецца каля 2,63 млн, зь іх каля 45 тысяч у цяжкім ці крытычным стане.

Брытанія выдзеліць $110 мільёнаў на пошук вакцыны ад каранавірусу

Брытанскі ўрад выдзеліць 93 мільёны фунтаў стэрлінгаў (110 мільёнаў даляраў) на дасьледаваньні з мэтай знайсьці вакцыну ад COVID-19.

Пра гэта 17 траўня заявіў прэм’ер-міністар Вялікай Брытаніі Борыс Джонсан. Джонсан дадаў, што дзеля гэтага будзе адчынены дасьледчы цэнтар у графстве Оксфардшыр.

Больш за 60 краін падтрымалі ідэю Аўстраліі пра расьсьледаваньне вытокаў пандэміі каранавірус

Ініцыятыву Аўстраліі і Эўразьвязу аб правядзеньні незалежнага расьсьледаваньня крыніцы каранавірусу ў сьвеце падтрымалі 62 краіны, паведамляе Інтэрфакс са спасылкай на аўстралійскую тэлерадыёвяшчальную карпарацыю АВС.

Падтрымка прагучала напярэдадні асамблеі Сусьветнай арганізацыі здароўя (САЗ), якая адкрываецца ў панядзелак у Жэнэве, і няўхільна расьце, перадае АВС.

Пакуль ні Кітай, ні ЗША не падтрымалі гэтую прапанову. Дыпляматы Эўразьвязу і Аўстраліі ўсё яшчэ працавалі ў нядзелю, каб пераканаць абедзьве буйныя дзяржавы аказаць ім падтрымку.

Галоўны санітарны лекар Расеі: рост захворваньняў на COVID-19 спынены

Рост захворваньняў на каранавірусную інфэкцыю ў Расеі ўдалося спыніць. Пра гэта 17 траўня заявіла галоўны санітарны лекар Расеі Ганна Папова, кіраўніца Фэдэральнай службы нагляду ў сфэры абароны правоў спажыўцоў і дабрабыту чалавека (Расспажыўнагляд).

Паводле Паповай, «дзень за днём практычна ўжо прыросту няма».

Паводле афіцыйных зьвестак, 17 траўня другія суткі запар выяўлена менш за 10 тысяч новых выпадкаў заражэньня — 9709, зь іх у Маскве — 3855.

Галоўны санітарны лекар Расеі: рост захворваньняў на COVID-19 спынены

Рост захворваньняў на каранавірусную інфэкцыю ў Расеі ўдалося спыніць. Пра гэта 17 траўня заявіла галоўны санітарны лекар Расеі Ганна Папова, кіраўніца Фэдэральнай службы нагляду ў сфэры абароны правоў спажыўцоў і дабрабыту чалавека (Расспажыўнагляд).

Паводле Паповай, «дзень за днём практычна ўжо прыросту няма».

Паводле афіцыйных зьвестак, 17 траўня другія суткі запар выяўлена менш за 10 тысяч новых выпадкаў заражэньня — 9709, зь іх у Маскве — 3855.

Штодня ў Расеі, паводле афіцыйных зьвестак, цягам апошніх двух тыдняў выяўлялі каля 10 тысяч інфікаваных каранавірусам. Пры гэтым колькасьць новых выпадкаў па-ранейшаму прыкметна перавышала колькасьць тых, хто быў прызнаны здаровым. Такім чынам, колькасьць тых, хто цяпер у Расеі хворы, кожны дзень павялічваецца.

969 чалавек захварэлі за суткі, агулам 29 650 станоўчых тэстаў на каранавірус, — афіцыйная статыстыка

Міністэрства аховы здароўя Беларусі агучыла статыстыку па хворых на каранавірус на 18 траўня. Агулам захварэлі 29 650 чалавек, плюс 969 новых выпадкаў за суткі.

У афіцыйным тэлеграм-канале міністэрства аховы здароўя зьявілася статыстыка па хворых на каранавірус за 18 траўня. За суткі захварэлі 969 чалавек, усяго праведзена 350 515 тэстаў.